Þá er enn og aftur komin helgi...ótrúlegt hvað þessar vikur fljúga....

Það eru allir orðnir hressir eftir veikindi og nú vonum við að það haldist í smá tíma
Vöggustofan var "hálf" lokuð í dag...það þýðir að það var starfsdagur en pössun fyrir þau börn sem ekki gátu fengið pössun annarsstaðar, og það var sem sé BV.  Við vorum nú svona pínu stressuð af því nú átti sem sé tvær ókunnugar(eða ekki alveg, leikskólastýran) að passa hann og vissum ekkert hvernig það færi í feimna barnið.  En hann kom foreldrum sínum á óvart og stóð sig þvílíkt vel  Svo þegar ég kom að sækja hann sagði stýran " Det er virkelig et dejligt barn du har!"  Hún var alveg ástfangin af honum, hann er svo góður og blíður og ég veit ekki hvað  alla vega gott að það var ekki á hinn veginn  Það voru bara sex börn og hann og ein stelpa einu "stóru" börnin og þá datt hann auðvitað í mjúkan og góðan leik með henni í dúkkó 

'Ég fór á fund í vikunni út af bekknum hjá Viktoríu og það er búið að ákveða að það verði aðstoð inni í bekk fram á vor.  Það er bara frábært og vonandi lagast þá þetta ástand.  Annars er hún bara sátt við skólann, fyrir utan þessa stríðnisstráka

Nú ætlar húsmóðirin að skella sér á lífið um helgina  ekki leiðinlegt það....ætla að fara á þorrblótið í Horsens, reyndar bara á ballið, en við "gömlu" (og þá í merkingunni frá í gamla daga) vinkonurnar ætlum að hittast og borða saman og kjafta aðeins og tjútta svo með "Á móti sól"....alla vega það verður stuð, ég get lofað ykkur því  Viddi Kriss verður heima að passa börn á meðan, þar sem hann fór einn í fyrra og ég var heima frekar fúlt en svona er að búa í útlöndum!

Jæja, ætla að fara að þrífa aðeins, Helgi og Habba ætla kíkja á X-faktor með okkur í kvöld, langt síðan við höfum hitt þau....
Eigið góða helgi og hafið það gott......

Þetta er að verða hálf slöpp bloggsíða...verður að viðurkennast, en það er bara nóg að gera þessa dagana
Ég byrja í skólanum á morgun, eftir "frí" frá því 18.des!!!  En ég búin að nota tímann vel og læra og hitta grúppuna mína og fara yfir ókláruð verkefni osfrv.  Það var frábært að fá tíma til þess.  Þetta verður aðeins erfiðari önn sem ég er að fara í núna...dáldið meiri lestur, virkar eins og hin hafi bara verið upphitun  En þetta er allt mjög spennandi og það er fyrir öllu. 
Það er búið að vera frekar rólegt hjá Viðari í janúar en það er að lifna við núna. 

Það var frábært að hitta Hörpu og Kidda aftur, áttum skemmtilega helgi saman og krökkunum fannst ekki leiðinlegt að hafa Hörpu sína
Það er líka alltaf góð getnaðarvörn fyrir fólk að koma til okkar  Þau geta nú stundum verið fyrirferðamiklar verur, þessar elskur!
BV er alveg á því hver ræður hér á heimilnu, og það er að sjálfsögðu hann sjálfur!  Þegar maður bannar honum eitthvað segir hann bara "NEI, ÉG HÆÐ!(ræð)"   Við hin erum nú eiginlega sammála því að maður þurfi að minnsta kosti að vera búin að læra að segja R áður en maður fer að ráða einhverju
Við fengum þvílíka himnasendingu frá Kidda og Hörpu, 6 kg af ýsu!!  Nammmmm, hann er gjörsamlega geggjaður þessi fiskur og það er fagnað í hvert skipti sem hann er í matinn, ekki slæmt það...
Viktoría er farin að bíða eftir vorinu, eins og við öll reyndar, enda búið að vera kalt í vetur.  Hún sér sólina og hitann í hyllingum og að þurfa varla að klæða sig til að fara út....ströndin, Legoland, busla útí garði....allt þetta fór hún að ræða um í gær  Já manni fer bara að hlakka til líka...

Við erum að skoða það að fara í bústað um páskana, veit ekki hvað verður...ef einhver vill með, þá bara slá á þráðinn 
Well hef þetta ekki lengra í bili, sendum kossa og knús á línuna....

Jæja þá er nýtt ár að ganga í garð og eins og venja er, er gott að horfa til baka...

Árið 2008 hefur á heildina litið verið gott.  Við erum búin að aðlagast vel hérna í Danmörku og líður mjög vel.  Okkur finnst tíminn mjög fljótur að líða og trúum því varla að við séum búin að vera hér í eitt og hálft ár

Í janúar byrjaði ég í nýrri vinnu og var mjög spennt yfir því.  Það var svo því miður ekki alveg eins og ég hafði átt von á og ég er mjög fegin í dag að hafa hætt þarna.  Flest allt var gegn minni eigin sannfæringu og það er ekki gott að vinna þannig.  Þannig að ég skráði mig sem "vikar" (afleysingaleikskólakennari) eftir þetta allt saman og þar öðlaðist ég gríðarlega góða reynslu og fékk góða innsýn í danskt leikskólastarf.  Ég var fljótlega bókuð á sama staðinn aftur og aftur(sem var vöggustofa) og líkaði það mjög vel.  Þar var ég svo meira og minna fram á haust.

Viðar færði sig úr sveitinni, niður í bæ, í byrjun árs,  á hárgreiðslustofu sem er aðeins fyrir karlmenn.  Þar líkar honum vel en ég er ekki frá því að karlrembann hafi aukist aðeins eftir þetta  Hann er kominn með góðan kúnnahóp og ánægður með samstarfsfélagana. 

Bjarki Vignir varð 2 ára í mars og er orðin stór og duglegur drengur.  Hann er mikill gaur og dettur ýmislegt í hug sem hann svo framkvæmir af mikilli gleði  Þannig að hann heldur foreldrum sínum við efnið  Annars á hann líka sínar ljúfu hliðar, þar sem hann er afskaplega lítill í sér og góður við allt og alla. Hann hefur eignast góða vini í leikskólanum og þeir brallla mikið saman, starfsmönnunum til mikillar gleði  Honum hefur farið mikið fram við að tala, bæði dönsku og íslensku.  Hann blandar þó enn mikið saman en framfarirnar urðu hvað mestar í sumar þegar við vorum á Íslandi.  Þannig að við þurfum að  vera dugleg að heimsækja landið okkar.

Viktoría varð 6 ára í júní og þá var mikil gleði.  Hún hélt veislu fyrir dönsku stelpurnar og líka fyrir íslenska vini og vandamenn.  Hún kvaddi leikskólann sinn í júní og byrjaði svo í skóla í ágúst.  Það hefur gengið vel og hún er heppin með kennara.  Hún fær auka dönskukennslu einu sinni í viku og er mjög sátt við það.  Hún er reyndar altalandi á dönsku en það er bara gott að hafa þennan stuðning.  Hún hefur eignast mikið af vinkonum og er mikil félagsvera.  Viktoría byrjaði á sundnámskeiði í haust og það gengur vel og hún er ótrúlega dugleg og áhugasöm.  Hún verður ákveðnari með hverjum deginum og reynir eftir fremsta megni að stjórna heimilinu en þar sem móðirin á bænum er líka frekar ákveðin, tekst það ekki alltaf 

Ég skrapp með krakkana til Íslands í júli og það var dásamlegt.  Okkur fannst það reyndar heldur stutt, þannig að við stefnum á aðeins lengri ferð næst  Við fórum norður, í sundlaugarnar,  í bústaðinn, í heimsóknir ofl. og það var bara frábært að hitta alla aftur.  Viðar var hins vega heima að vinna á meðan en hann lofar að koma með í næstu ferð!

Ég byrjaði svo í talmeinafræði í Odense í september.  Þar líkar mér svakalega vel.  Þetta nám er mjög skemmtilegt og krefjandi og ég er búin að kynnast fínum stelpum þarna, sem hjálpar mér mikið.  Það hefur tekið pínu á að keyra á milli en við höfum eiginlega ákveðið að flytja ekki að svo stöddu, þar sem krakkarnir eru búnir að koma sér svo vel fyrir og Viðar komin í fína vinnu.  Maður leggur ýmislegt á sig fyrir rétta námið  Ég fer í eitt próf í janúar en annars eru próf í vor.

Það hefur ekki verið eins mikill gestagangur þetta árið eins og var í byrjun en þó létu sumir sjá sig oftar en einu sinni  Við fórum í ferð með Hörpu, Gunnþóri og fjölskyldu til Belgíu í sumar, sem var bara frábært.  Síðan hafa nokkrir kíkt við í helgarferðir ofl.  Við þökkum þessu góða fólki fyrir komuna og verið velkomin aftur

Við höfum eytt ótal stundum með "Horsensfólkinu"(Helga og Hafdísi) okkar á árinu, farið í sumarbústaðaferðir, matarboð, kaffiboð ofl.  Við þökkum að sjálfsögðu fyrir allar þær góðu stundir, það er ómetanlegt að eiga góða vini í útttlöndunum

Að lokum viljum við óska öllum gleðilegs árs, með þökk fyrir árið sem er að líða.  Takk fyrir allar kveðjurnar á heimasíðuna okkar og á Barnaland. Nú eru hjónaleysin komin á facebook, þannig að það er enn auðveldara að halda sambandi
Við vonumst til að sjá ykkur sem fyrst og sem flest á nýju ári og hlökkum til að takast á við nýtt ár í Danmörku. Sendum áramótakossa og knús til allra!

Jæja þá eru flestir komnir í jólafrí...nema Viðar  Yndislegt og við ætlum bara að njóta þess að vera í rólegheitum...

Við fórum í jólamatarklúbb á laugardagskvöldið og það var rosa fínt.  Viðar komst reyndar að því að hann þolir ekki þennan danska jólamat, fær alltaf illt í magann  Vitum ekki hvað það er, kannski blessaða síldin!  Halldór Gauti passaði grísina fyrir okkur og það gekk ljómandi vel og þau sjá ekki sólina fyrir honum, sérstaklega BV

Við skreyttum jólatréið í gær og það er nú í minna lagi í ár, enda kreppa  en það var ljómandi fínt þegar skrautið var komið á....BV var svona misduglegur að hjálpa, tók af trénu líka, tróð skrautinu inn kertastjaka og fór svo og þvoði smá jólaskraut með klósettburstanum Hann er einstakur þessi elska, það eru engin takmörk fyrir því sem honum dettur í hug
Viktoría er nú eiginlega bara orðin eins og fullorðin í samanburði, hún stóð sig mjög vel.  Hún fékk hins vegar aðvörunarbréf frá gáttaþefi í dag um að hann vonaði að hann þyrfti ekki að koma með kartöflu í skóinn, svona rétt fyrir jól....ég held að hún sé að hugsa málið....
Já, jólaundirbúningur getur tekið á

Annars hlökkum við bara til jólanna og ætlum að njóta þess að vera saman.  Við verðum hjá Helga og Hafdísi á jóladag og Atli og Selma koma til okkar á annann í jólum.  Við förum svo til Kolding á áramótunum, þannig að það er ekki eins og við séum ein og yfirgefin um jólin  Við komum þó til með að sakna fólksins okkar mikið....

Við ætlum að borða íslenskan saltfisk á þorláksmessukvöld, nammmmm sem kom með Viktoríu, og hlökkum mikið til.  Mjög langt síðan við höfum fengið fisk.

En við viljum bara óska ykkur öllum gleðilegra jóla og hafið það yndislegt yfir hátíðirnar.  ST'ORT jólaknús og kossar til allra